هي إمرأة تونسية في مقتبل العمر الكهولي، وضعيتها الاجتماعية وحيدة مع طفلين بنت متفوقة في دراستها وتلعب رياضة التايكواندو وابن مريض بالتوحد.
امرأة تكافح وتعمل ليلا نهارا من اجل تربية طفليها على احسن وجه
عشقها الوحيد هو النادي الافريقي، فقد اختارت من النادي الافريقي شريكا لحياتها ينسيها كل همومها ويريح عنها ضغوط الدنيا
استغل موقعنا هاته المرأة الفولاذية ليحاورها ويقدم عن طريقها درسا لكل امرأة تونسية تعاني أو لها ابن او طفلة مريضة مهما كان المرض
حاورها أيمن قريسة وكشف لنا حياة لطيفة العياري عن طريق هذا الحوار
*لطيفة العياري نبدأ حوارنا بالسؤال عن وضعيتك الاجتماعية واحوالك المادية
ـ حالتي الاجتماعيه كنت معرسة برجل ميسور الحال وعندو أملاك بعمري ما خدمت في جانفي 2012خرجت من دار طليقي وبنتي صغيرة ولدي مازال ما تولدش اضطررت باش نخدم حتى أخر شهر من الحمل وتوا لاباس خدمت برشا خدم
*لطيفة لديكي طفل مريض بالتوحد ، لو تفسري لنا طيف اكتشفتي الحالة يعني في أي سن بالتحديد وكيف تعاملتي معها في البداية ؟
ـ اكتشفت لي ولدي عندو طيف توحد ملي عمرو عامين مالأول نطق كلمات و مبعد سكت و كان ما يتفاعلش معانا في الدار عبارة في عالم اخر واول ما زرنا المختصة النفسية أنا قلتلها ولدي عندو مرض التوحد .
*انت امرأ وحيدة وفي رقبتك طفلان ، طفلة متفوقة في دراستها وميدو ابنك المتوحد ، هل اضطررتي يوما لطلب المال أو طلب الاعانة من أشخاص طلبوا منك المقابل ؟
ـ الحقيقة لم أضطر لأني في السنوات الماضية وصلت نخدم 17ساعة في النهار خاطر حصص النطق غالية وانا طبيعتي قوية ما نهبطش راسي خدمت في كل شيئ خدمة النهار مش عار
* علاقتك بأطفالك وكيف تسهرين على تربيتهم ؟
ـ علاقتي بولادي صحاب نخرجو مع بعضنا نضحكو مع بعضنا نعيشو غرامنا و محبتنا الإفريقي مع بعضنا أما ساعات نكون قاسية خاطر نحب بنتي تكون متفوقة ونحب نظهر الناس الكل لي أنا نجحت أنا نمثللهم الأم الحنينة والبو الصعيب
ـ بالنسبة لميدو هل هناك جمعيات معنية بهذا المرض ساندتك وهل هناك تحسن في حالته الصحية ؟
بالنسبة لميدو يدرس في مركز خاص و حتى جمعية ما عاونتني أما مدير المركز ياخو شطر شهرية وانا خرجت ولدي مالتوحد رفضت نعطيه مهدئات و قريت برشا عالتوحد عبر الانترنت و ميدو حالتو تحسنت بنسبة كبيرة
ـ ابنتك متفوقة في دراستها وتلعب رياضة التايكواندو اذا كيف توفق بين الدراسة والرياضة حسب رأيك؟
بنتي متفوقة في الدراسة كل عام تنجح مالأوائل 17/18معدل والرياضة غرامها يعني بعد يوم دراسي مطول ساعة تايكواندو تعتبر راحة و خاصة بعد التتويجات بطولة وطنية صغار أداني 2016/2017 تتعب في المشاركات أما تعلمت التحدي
*ماهو حلمك لطيفة العياري ؟
حلمي ولدي يبرى و يلقى شكون يأطر موهبتو خاطر كل طفل توحدي عندو موهبة فما مشاهير التوحد نيتشة آنشتاين وبنتي تكون بطلة أولمبية و مهندسة معمارية
*ماهي علاقة عائلتك المصغرة بالنادي الافريقي ؟
علاقة عائلتي بالنادي الإفريقي قصة غرام ككل ام في أيام الرضع الاولى تغنيلهم أنا ولادي كبرو على ماني ناسي الإفريقي في عينيا نحن نتنفسو الإفريقي في كل ركن تلقى درابو مريول فهمو حب الإفريقي من حب الأم وخاصة بعد الفيديو الشهير لبنتي أصبحت عندها شعبية في صفوف جماهير الإفريقي و تعرف أغلب عناصر الفيراج.
*لطيفة العياري وبالنظر لوضعيتك الاجتماعية ماذا تطلبين من الدولة بالأساس ؟
ـ نطلب مالدولة إدماج ولدي وأطفال التوحد في المدرسة خاطر حق من حقوق اي انسان الدراسة وأنا وبرشا عباد ما يقدروش عالمرافق باش ولدي غدوة ينجم يندمج في المجتمع و يكون عنصر فاعل ينفع روحو و بلادو ما يمد يده لحد وما يكونش منحرف
*رسالتك لقراء التونسية نات حسب حالتك الاجتماعية
ـ قراء التونسية نات أنا مرا بسيطة أما تحديت الظروف الكل كافحت من أجل صغاري نتمنى ولدي وكل طفل توحد نقبلوه على إختلافو و نتمنى بنتي كيف هي ممتازة في رياضة التايكواندو وتلعب في صنف أصاغر تتمتع من وزارة الرياضة بالسفر خاطر أنا ما نقدرش خاطر المدربين المباشرين ليها أكدو جدارتها كلاعبة و نوجه الشكر لكل إنسان عاونني بالكلمة الطيبة وخاصة جماهير النادي الإفريقي
حاورها ايمن قريسة
