“رحم الله كل ضحايا الفقر و التهميش و اللامبالاة في بلادنا” هكذا نعت النائب بمجلس نواب الشعب خولة بن عائشة ضحايا التهميش في سيدي بوزيد وأضافت في تدوينة على صفحتها الرسمية فايس بوك:”هيبة الدولة .. مصطلح يتداولو فيه الناس الكل و يلعبو بيه كيف الكرة … في كل عجة يدخلوه … استعمالات على كل لون يا كريمة … و النافع ربي ..
هيبة الدولة راهي ، عيش كريم للمواطن … راهي جباية عادلة بين المواطنين… راهي مواطنين تحترمهم مؤسسات الدولة و يحترموها …. راهي مواطنات يصونهم القانون و يعطيهم مكانتهم لي يستحقوها في المجتمع …. راهي توزيع عادل للثروات و الاستثمارات بين الجهات … راهي مسؤولين يحترمو القوانين و يقدسو القسم لي عملوه كيف خذاو مسؤولياتهم ….راهي قوانين تراعي انسانية المواطن و تحفظلو حرمتو … راهي طفولة محمية و موش مهمشة… راهي مناهج تربوية تتماشى مع متطلبات سوق الشغل للعشريات القادمة ، ترتقي بالطلبة و تفتحلهم آفاق … راهي منظومة صحية تحفظ الذات البشرية …راهي سيادة داخلية موش قايمة عالمحابات و المحسوبية … …راهي سياسة خارجية تفرض الاحترام و تخدم مصلحة الوطن و المواطنين اولا و قبل كل شيء …
هيبة الدولة هي هيبة كل مواطنة و مواطن !
مادام الذات البشرية ما عندهاش قيمة في بلادنا مانحكيوش على هيبة الدولة ..
رحم الله كل الذوات البشرية الي ما نجمتش دولتنا تحميهم و تحفظ حقهم في الحياة و الي ما نتفكروهم كان كيف تصيرمصيبة “.
