تحدثت النائب بمجلس نواب الشعب خولة بن عائشة عن كارثة مستشفى الرابطة وعن الفساد الذي نخر البلاد وإليكم ما دونته:
انخرام منظومة التربية و التعليم و منظومة الصحة العمومية هو عملية ممنهجة لضرب أسس الدولة و نتيجة تراكمات و لوبيات فساد و تهريب ترتع في كل بلاصة و تقاعس و تفشي ظاهرة الرداءة و التعيينات العشوائية على اساس الولاءات و المصالح و المحسوبية في مختلف هياكل و مؤسسات الدولة منذ ان ‘ طلع البدر علينا ‘ ذات يوم من أيام 2011 …
الإصلاح ممكن ماهواش مستحيل لكن يلزمو استراتيجية و منهجية و وقت و ناس اكفاء و خاصة إرادة موش لي يجي يحل ملف و لا يصلح حاجة تهيج عليه اللوبيات و اصحاب المصالح و نجيبوه على برة و لي بعدو يزين سعدو و طالما ساكت و راكش و يغض النظر علي صاير و يقضي لهذا و هذاكة امورو هانية …
للأسف شؤون الدولة تسير منذ سنوات بمنطق ‘ الهواة’ (Amateurisme ) و طالما باش يتواصل الحال كما هو عليه باش يتواصل إضعاف الدولة و استنزاف مؤسساتها و تغول اللوبيات و الفاسدين …
مادام القانون ما يتطبقش بصرامة على الجميع و منطق الإفلات من العقاب هو السائد و نسربيو في جرعات مخدرة للرأي العام باش نسكتو الامو مؤقتا بتقديم كباش فداء لا عملت لا يدهم لا ساقهم في معظم الحالات و لا عندهم مسؤولية غير مباشرة مادام ألداء هذا مازال باش ينتشر و باش يكمل يقضي علي مازال …
الي صار في مستشفى الرابطة الايام لي فاتو رغم فضاعتو – ربي يرحم الوليدات لي توفاو و يصبر عائلاتهم و خاصة امهاتهم لي ما ينجم يتخيل شويتهم و وجيعتهم حتى حد – ماهو الا احد الأمثلة مالي قاعد يصير و مازال باش يصير في بلادنا اذا تواصل الوضع كيفما هو …
و استقالة السيد وزير الصحة الدكتور عبد الرؤوف الشريف ماهو الا شبه مسكن من المسكنات الي موش باش يعوض العائلات في وليداتهم لي توفاو و لا باش يصلح قطاع الصحة العمومية و لا باش يقضي على اللوبيات الموجودة …..
استقالة السيد وزير الصحة الي نحبو و نحترمو ياسر و ما نشكش لحظة في نيتو الصادقة و قدرته على خدمة البلاد و الإسهام في إصلاح منظومة الصحة العمومية – و خلافا للعديد من المسؤولين في هالبلاد كان عندو ليه برنامج و استراتيجيا و رؤيا – هو صحيح تحمل لمسؤولية اخلاقية و سياسية فرضتها الحادثة هذي و فيه دليل كبير على شجاعة هذا الرجل و صدقه و عدم تمسكه بالكرسي لانو من الناس الي باش يواصلو يخدمو و يحاربو باش ينفعو تونس من اَي موقع لكنه غير كافي لإصلاح الأوضاع و تحسينها و لا لتبريد قلوب الرأي العام كيما نقولو …
الأكيد انو الدكتور عبد الرؤوف الشريف باش يكشف كل الحقيقة حول الكارثة لي صارت و المسؤولين عليها و الأكيد زادة انو كفاءة لكن في الحكومة و المنظومة الغالطين … عدة أسئلة تبقى مطروحة و أهمها : هل النية في محاربة الفساد و الفاسدين مجرد شعار و لا إعلان مع تأجيل التنفيذ و لا انو الفساد أقوى من الدولة ؟
#محاربة_الفساد_موش_شعارات
#لا_للإفلات_من_العقاب
