برهان بسيّس: سامحني ألف مرة.. يا رانية يعيّش بنتي..

التونسية
وجّه الاعلامي برهان بسيّس رسالة اعتذار إلى المهندسة التونسية في علوم الفضاء رانية التوكابري بعد أن دعاها في برنامجه ‘تحت السور’ للتعريف بنفسها ونجاحها وتميّزها…لتتحول الاستضافة إلى حملة تشكيك وإنتقادات واعتداء على رانية…
وقال بسيّس في تدوينة نشرها على حسابه الرسمي بموقع الفايسبوك، “حبيت نقلّك يا رانية التوكابري سامحني… سامحني.. سامحني ألف مرّة….. كلّو منّي اللّلي خليتك تعيش هالتجربة القاسية إنك تتعّرف على جزء من شعبك العظيم…. شعبك اللّي تَحوّل لهندوس شمال أفريقيا اختصاصه تقديس بقرة….. وأيّ بقرة… بقرة الفشل المقدّس…… سامحني يا رانية يعيّش بنتي..
النص الكامل للتدوينة:
الشابة التونسية هاذي جاتنا لتحت السور وشرفتنا بحضورها، باحثة ومهندسة في الفضاء و بش تكون ان شاء الله رائدة فضاء بعد ما تم اختيارها ضمن برنامج تشرف عليه وكالة الفضاء الأوربية اسمو قري القمر….. رسالة حبينا نوجهوها للشباب في بلادنا انو الأمل في النجاح عن طريق العمل والمثابرة يبقى ديما ممكن في كل المجالات خاصة وانو رانية التوكابري تخرجت من مدارس وجامعات تونس…. رانية طلعت من هنا وبدات عروض التهجم و التشكيك فيها على زوز حاجات، كيفاش تقول رأيها الشخصي جدا انو العلم زاد قربها من ربي وانها تقرأ القرآن و بداو بعض الاخوة والأخوات يفتشو عليها في سجلات النازا ووكالات الفضاء العالمية لا يندرا عندها cnss غادي ومرسمة والا مقيدة على آلية مالآليات!!! اليوم على الصباح لقيت البنية في حالة صدمة واحباط من حجم هالبؤس الي أصابها كاتبة تدوينة للأسف تقول فيها انو اقتنعت بحاجة انو بلادنا موش متع عودة او عيشة…. حبيت نقلّك يا Rania Toukebri سامحني… سامحني.. سامحني ألف مرّة….. كلّو منّي الي خليتك تعيش هالتجربة القاسية انك تتعرف على جزء من شعبك العظيم…. شعبك الّي تحوّل الي هندوس شمال أفريقيا اختصاصه تقديس بقرة….. وأي بقرة… بقرة الفشل المقدّس…… سامحني يا رانية يعيش بنتي..