محسن العيفة يعلق على مسلسل الفوندو

كتب محسن العيفة
علاش عجبني مسلسل الفوندو
كل مشهد فيه ميساج , كل مشهد يدخل في أعماق الإنسان و يخليه يسأل برشا أسئلة و مذبيك متجاوبش عليهم ..
زعمة صاحبي هذاكا صاحبي !؟ علاش الدنيا بالمصالح !؟ لازمك تكون خبيث باش تعيش بيناتهم ؟ علاش الي عاقل و دوب روحو يعفسو عليه ؟ زعمة شكون يهز معايا محنتي !؟ ..
و في وسط الأسئلة هاذي لكل فما سؤال واحد تنجم تجاوب عليه و هو آخر سؤال .. خاطر في الدنيا هاذي ملي نتي صغير تحط ساقيك عالقاعة و تبدى تمشي كل خطوة تزيد تكبر و العمر يزيد بيك و كل متبقى تمشي ديما باقي تسمع في صوت يمشي وراك عينو عليك ينصحك و يخاف عليك يساندك و كل ممشيت و بعدت ديما وراك , كي إطيح ميخليكش و كي تاقف يشجعك و مهما عملت و صار ديما معاك ( هي أمك ❤️ ) ..
الفوندو يوريك الي الوقت صعيب و كيما قالها المروكي في المسلسل ” الناس لكل عملت حساب كل شئ و تحكمت في كل شئ كان حاجة بركة لا نجموا يبدلوها و لا يتحكموا فيها الي هي الوقت ” ..
20 سنة في الحبس تعدى و قت كبيييير , ظلم تحس بيه , أقرب الناس ليك بعد و نساك , نهارت الي خرجت ووقفت قدام المراية معقلتش روحك جاء في مخك الطفل الصغير الي مازال كي خذا الباك و باش يبدى حلمة و غمار جديدة في الدنيا لكن يجي سبب يقصلك كل شئ ..