نقابة قوات الامن الداخلي تنحاز للشعب/التفاصيل

 اصدرت نقابة قوات الامن الداخلي نداء عبر صفحتها الرسمية فايس بوك دعت فيه الامنيين ومع بداية تصاعد وتيرة الاحتجاجات الى عدم قمع المتظاهرين:”الى كل الامنيين من كل التشكيلات :

مع بداية تصاعد وتيرة الاحتجاجات نحب ننصحكم جميعا :

لا لقمع المتظاهرين

لا للاستعمال المفرط للقوة

لا للتهور

لا للمجازفة بصحتك

الناس اليوم خرجت تعبر على رايها الرافض لسياسة التفقير و التجويع الي يعانيو منها و ماتنساش يا زميلي :

انت اول المتضررين لانك شهار و اقل واحد يخلص في الوظيفة العمومية و لانك انت زادة متضرر من غلاء المعيشة ..

زميلي الناس بشهايدهم وبطالة خاطر ماعندهم كان وجه ربي و ماعندهمش خالهم معروف كان مناضل قبل و خاطر زادة ماعندهمش ابواق توصللهم صوتهم خاطر ماعندهم مايعطيو ..

زميلي انت بش تكون الخاسر و اكبر متضرر لو تكون مالمصابين و تفكر الي لا عندك قانون يحميك اثناء التدخل و لا عندك قانون يوفرلك التعويض كي تتضرب

انت اول واكبر الخاسرين

كون ذكي و ماتكونش انت الوقود

ما تقمعش الطبقة المفقرة الي انت تنتميلها

رد بالك على روحك و على تجهيزاتك

والي قالك ناقفو لتونس قلو مانقمعش اولاد بلادي والحاجة الوحيدة الي ننسى اني ماعنديش صندوق يعوضلي هي مواجهة العدو الخارجي الي يهدد سلامة اولاد بلادي فقط ..

حد مايرحمك يا زميلي لو تغلط و كي يصفى الجو اول واحد يبداو بيه هو انت بش يكممو الافواه ويمسحو فيك ايديهم ..

ماتعطيهمش الفرصة و الي زرع الخراب في بلادنا خليه هو وحدو الي يتحمل مسؤوليتو و يهبط للشارع يعطي حلول للناس المقهورة وانت اولهم ..

لا ولاء الا لتونس

احنا ابناء هذا الشعب و من الشعب و الى الشعب